ரயில் பயணிகள் கவனத்திற்கு

ரயில் மறியல் செய்யவந்த
கூலிக்காரக்கூட்டம்
வேறவொரு மறியலில்
தவிக்கிறது




சூது கொண்டு பலர்
இருக்கை பிடிக்க
ரயிலில் முந்தினர்
கடைசியாக சங்கிலியுடன்
வெளியே வந்தான் கள்வன்


சண்டை போட்டு
புது மாநிலம்
வாங்கியபின்
ரயில்எல்லையில்
பலகை வைப்பார்
'அன்புடன் அழைக்கிறது'


அவரவர் வேலை அவரவருக்கு
எவரோ ஒருவரின் வேலையை
இவர் பெருக்குகிறார்
துப்புரவு தொழிலாளியாக


வெளியே குதித்த
பிளாஸ்டிக் குடுவையால்
எடை குறைந்து
மூச்சுவிட்டது ரயில்
மூச்சு முட்டியது பூமிக்குத்தானே


சாமி வேஷம் போட்டு
ரயிலில்பிச்சை எடுப்பவர்
சோறு ஊட்டப்படும்
குழந்தைக்கு பூச்சாண்டியாக